توربا تیکمه توره‌نی

اوزوم مؤوسومونه باغلی دب‌لردن ؛ توربا تیکمه توره‌نی

تورکجه سرویسی : اوزوم مؤوسومونه باغلی دب‌لردن ؛ توربا تیکمه توره‌نی 

 

 

هر ماحالین دورمو-ایله باغلی اؤزل ایشلری وار دوروم دئینده هاوا ٬ داغ ، یاماج ، دنیز و هابئله بیتگی‌لر و حئیوان‌لار اولور و ألبت بونلار بیربیرینه باغلی دیر  داغ داشدا داوار سورولری اولاجاق  و یایلاق‌لارین هاواسی سرین بئله‌سی یئرده بیتگی‌لر و باغ‌لار تام فرقلی اولور؛ یاغیش بول اولان یئرلرله ائل آراسیندا بئله‌سی ایشلر ایلـلر اؤنجه  ایل کؤمه‌یی ایله حاضیرلانیب  اؤرنک اوچون بوغدا بوتون اؤلکه‌لرده أکیلیر اونو أکیب هابئله سووارماسی دؤیمه‌سی  و ائوه داشیماسی اوچون  خالق بیریندن سوروشمادان  هابئله پول سؤزو آرایا گلمه‌دن اؤز ایچلرینده پای پای کؤمک اولوبلار  ایندیکی سؤزجوک‌لرله دئسک بیر ساده سوسیالیزم یاشاییبلار. 

 

اورمو ماحالیندا هاوا و تورپاق هر نه‌دن چوخ اوزوم اوچون اویغون اولوب  اوزوم تنه‌که‌لری بیر بویون-باغی کیمی او شهرین بوینوندادیر  ائل آراسیندا اوزوم اوچون گؤزل دبـلر وار نه یازیق کی بو دبـلری ایندی اونودوب و یاددان  چیخارتمیشیق  بو گؤزل دب توربا تیکمه توره‌نی‌ایله باشلانیر  قورالار دریلیب سویون قیش گونـلری اوچون حاضیرلایاندان سونرا هر کند و محله‌نین قیز گلینی گونده بیر ائوه توپلانیب و اوزوم‌لر اوچون توربا تیکیردیلر  کی اوزوم‌لر  آری و قوشدان قورونسون  هر باغ اوچون نئچه‌لر توربا لازیماولوردو  بللی کی هئچ ائوده بو قدر توربا تیکیلمه‌سی اوچون زامان یوخ  ائله بو اوزدن قورادان سونرا توربا حاضیرلاماغا باخیردیلار ، ائو صاحابی دا دوروموندان آسیلی  اونلار اوچون آش‌دان شوربادان حاضیرلاییردی  بو ائل ایشینین أن گؤزلی بو کی هر کسین باغینین ایلک باری اولسایدی اؤنجه اونون تورباسین تیکیردیلر ، بئله‌لیک‌له او آدام  ائلی اؤزونه دایاق بیلریدی   بیردن بیرینین باغیندا بار اولماسا یا آز اولسایدی آرتیق توربالارین بورج وئریردی و قارشیسیندا اوزوم یا دوشاب آلیردی ،  بئله‌لیک‌له   قوجالار اوچون کی باغ صاحاب اولماق مومکون دئییل‌دی  قیش گئجه‌لری توربا تیکیب و بورج وئریردیلر. توربا تیکمه‌لر نئچه گون زامان آپارماسی ، کندین یا ماحالین باغلارینین سایی‌نا باغلی اولوردو  چوخلو قیزلاردا ائله بو تورن‌لرده سئچیلیب و آداخلانیردیلار   ائل آراسیندا بو تؤرن‌لر اوچون گؤزل بایاتیلار دا واریمیزدی

 

 

بوداق دا واردی اوزوم

اوزوم‌سوز نئجه دؤزوم

توربا تیکن قیزلاردا

قالیب‌دیر منیم گؤزوم

 

توربا بو گون بیزده دیر

پارچا قالخیب دیزده دیر

نیشانی  وئرمک اوچون

منیم گؤزوم ایزده دیر

 

اوزوم باغی آلمیشام

دادا حئیران قالمیشام

آری‌لاری ألیندن

توربالارا سالمیشام

 

توربا گونو پیلوو وار

پیلوو اوچون سینوو وار

اینه باشی أییلسه

یانیندا بیر بیلوو وار

 

 

اوزوم‌له باغلی قالان تورن‌لری زامانیندا حاضیرلاییب و یایاجاییق.

 

  آراشدیریب و توپلایان

 #رضوان_حاج_قاسملو

 

 تورکجه‌نین سردبیری

#محمد_حسن_نژاد

 

 

اگر این مطلب را مفید ارزیابی کردید لطفاً به اشتراک بگذارید :