” باشیما داریخان قول ” کیتاب‌یندان بیر حیکایه

عزیز بالام گل یانیما گل اوره‌ییم، بارماق‌لاریم داریخیب ساچ‌لاریندان ساری

تورکجه سرویسی:  ” باشیما داریخان قول ” کیتاب‌یندان بیر حیکایه

مارالین جئیران قوناغی

عزیز بالام گل یانیما  گل اوره‌ییم، بارماق‌لاریم داریخیب ساچ‌لاریندان ساری

 

 یام یاشیل داغین یاماجین‌دا بول اوتلو گوللو اوتلاق واریدی کندین آداخلی چوبانی هرگون قویون سوروسون اورا آپاریب اوتاراردی؛ بیر کیچیک گؤزل بولاقلی تارلاسی دا واریدی کی سویو یارغان‌لارا ساری آخاردی، دورو آخدیغی‌نا خاطیر “آی بولاغی” آدلانمیشدی.

بو ایل تارلانین قوناغی گونه‌باخان‌لار ایدیلار، یازین اورتا  گون‌لری‌نین بیرینده چوبانین مارال آدلی آداخلی‌سی ناهار ألینده یاماجا دوغرو یولا دوشدو، داغ باشی دولویدو آغ بولودلاری‌لا آداخلی قیز ایستییردی سهنگ‌ینده چوبانا سو آپارسین او اوزدن یولون چئویردی تارلایا ساری کی سئرچه‌لرین قیشقیرتیسی‌نی ائشیتدی، دوشوندو هله گونه‌باخان‌لاردا توخوم یوخ، بو هارای داد ندیر قوش‌لار ایچینده؟ کئچدی یارغانین یانیندان سهنگین دولدورسون کی گؤردویونه حئیران قالدی!

آی کیمی دورو سو قریب لیل‌‌لنمیشدی!

مارال بیردن سئرچه‌لرین قیشقیرتیسی‌نین یادینا دوشوب و بولاغا دوغرو تارلانین ایچینه کئچدی، اوزاق‌دان بولاغین باشیندا  قارالتی گؤردویونه خاطیر قورخدو آما گئری گئتمک گوجو یوخویدو، ائله بیل بیری مارالی ایره‌لی گئتمک اوچون ایته‌لییردی یاخینلاشاندا گؤردو آمان تانریم بیر یارالی جئیران، هله بوغازدی دا !!

مارال توتولدو بیلمه‌دی نه ائله‌سین، جئیران مارال‌دان قورخدو و دورماق ایستییردی

مارال بیر حزین ماهنی زومزومه ائله‌دی :

گول‌له‌لردن یارالی

هارالی‌سان هارالی

سنه قوربان اولایدی

بو داغ‌لارین مارالی

جئیران سانکی ماهنی‌نین سؤزلرین دوشوندو و دوشدویو یئرده قالدی، قیز جئیرانی تومارلایارکن ألینی یارایا ساری آپاردی و تیکان‌لاری گؤتوردو  وااای اوخا توش گلیب! ناراحات اولدو آخی یازدا دا اووا چیخارلار؟ نئجه اوره‌ییندن گلدی بوغاز حئیوانی اوخلویاسان؟ سنی دوشونجه‌سیز اووچو!!  مارالین یوباندیغی اوزدن آداخلیسی نیگران اولوب و سورونو یاماج‌دان قایتاردی. مارال جئیرانی تومارلایارکن زینقیروولارین سسینی ائشیدیب کؤمک آلماق اوچون تارلادان ائشیگه قاچیب چوبانا یئتیرجک گؤردوک‌لرین دانیشدی بیرلیکده جئیرانا دوغرو گلدیلر‌ مین گوج‌ایله بیرلیکده جئیرانی داشقا کیمینه چیخاردیب اؤزلری‌ایله آپاردیلار.

طووله‌ده اونا یئر حاضیرلاییب اوت سو وئریب و یاراسی‌نا مرحم قویدولار.   دان یاریلانا قدر مارال جئیرانی‌لا طووله‌ده اوتورموشدو کی جئیرانین حالی‌نین دَییشیلمه‌سی‌نی حیس إدیب کؤمک آلماق اوچون قاچار إشیگه، آتاسی‌لا قاییداندا گؤرَرلر وااای جئیران آلا گؤز بالاسین سئوگییله یالیییر.

#محمد_حسن_نژاد “ایلقار”

 

 

 

اگر این مطلب را مفید ارزیابی کردید لطفاً به اشتراک بگذارید :