اوشاقلارناغیلی: بالاجاقوزو

یازار:علی زنگانلی(وولکان)

تورکجه سرویسی: یازار:علی زنگانلی(وولکان)

 

 

 

بیری واریدی بیری یوخ ایدی

آللاهدان ساوای هئچ کیم یوخ ایدی

دونیانین بیر بوجاغیندا مئشه‌نین یانیندا بیر گؤزل کند واریدی، او کندین ایچینده

بیر گؤزل قویون واریدی، گونلرین بیر گونو بو قویونون دوم آغ دوزلو بیر بالاسی اولور، بالاسی‌نین آدینی قار دنه‌سی قویار، آیلار کئچر قار دنه‌سی بؤیویوب ائولریندن ائشیگه چیخماق ایسته‌یر.

آناسینا دئیر آنا من گئدیرم قاپیمیزدا اوینایام، گؤروم کوچه‌ده اؤزومه اویناماغا یولداش تاپارام.

آناسی دئیر:

گؤزلیم قار دنه‌سی

آنالار بیر دنه‌سی

گؤزتله سن اؤزوندن

بالالار ار دنه‌سی

اوزاق گئتمه سن بالا

چاققال دوزاغا سالا

قوردلار گلیب اپارا

آنان بالاسیز قالا

آناسی اونا اوزاغا گئتمه‌سینی تاپشیریب ائشیکده اویناماغا اجازه وئردی. انجاق مئشه‌یه ساری گئتمه دئدی.

قار دنه‌سی سئوینجک ائودن ائشیگه گلدی، بو یانا باخدی او یانا باخدی، هئچ کیمسه‌نی گؤرمه‌دی.

قونشولوق‌لاریندا بیر کؤپک واریدی، قاچاراق اونون یانینا گئدیب منله اوینایارسان دئدی.

کؤپک آخی منله سنین نه اویناماغین دئیه باشینی قوللاری اوسته قویوب یاتدی.

قار دنه‌سی یالقیز اولدوغونا چوخ اوزولدو، بو حالدا بیر کپه‌نک اوچا_اوچا قار دنه‌سینه یاخینلاشدی، قار دنه‌سی تئز اونو گؤرجک منله اوینایارسان دئدی.

کپه‌نک دئدی منی توتسان اوینایاجاغام.

قار دنه‌سی گوله_گوله، سنین توتماغین منه بیر شئی دئییل دئییب اونون آردیجا قاچدی.

کپه‌نک گئتدی قار دنه‌سی گئتدی، بیر واخت قار دنه‌سی اؤزونه گلیب گؤرودو چئوره‌سی اونا یاد گلیر.

بورا هارادیر من گلدیم، ائی آللاه ایندی نئجه ائوه قاییدیم اؤزونه دئدی.

قار دنه‌سی اوینایاراق ائولریندن چوخ اوزاغا گلیب مئشه‌نین ایچینده ایتمیشدی، نه ائتمه‌گینی بیلمه‌ییردی، آغلاماغا باشلادی نه یازیق آغلاسایدی دا ائوینی تاپانمایاجاق ایدی.

قار دنه‌سی‌نین اناسی نئچه ساهات سونرا اونون یوخلوغونو بیلیب تئز کوچه‌یه چیخیب قار دنه‌سینی اونله‌دی، بوندان اونله‌مک قار دنه‌سیندن خبر اولمادی.

هارا گئدیم نه ائدیم نئجه قوزو بالام الدن گئتدی دئیه او تای_بوتایا قاچیردی.

بیردن فیکرینه گلدی قونشو کؤپکدن قار دنه‌سینی سوراغلاسین.

سالام سنه آی کؤپک

پارچالانیب‌دیر اورک

ایتیرمیشم بالامی

منه یئتیر سن کؤمک

 

اولسون سلاملار سنه

سؤیله گؤروم  سن منه

نه‌دیر بو های_های قونشو

هارا گئدیب قار دنه

کؤپک سؤیله‌دی نئچه ساهات اؤنجه قار دنه‌سی منله اویناماق ایسته‌ییردی انجاق من یاتدیم داها گؤرمه‌دیم هارا گئتدی، انجاق نگران اولما ایندی ایی چکیب اونون ایزینی تاپاریق.

کؤپک ایی چکمکده چوخ باجاریقلی حئیوان اولاراق یئری اییله‌مه‌گه باشلاییب قویون دا اونون آردیجا یولا دوشدولر.

بالا_بالا واخت قارالیردی قار دنه‌سی ده هئچ بیلمه‌ییردی نه ائتسین او گونه چان هئچ قارانلیقدا ائشیکده قالمامیشدی، چئوره‌سینه باخیب ایچی اویولموش ماغارا کیمی بیر آغاجی تاپیب سئوینجک اورا سیغیندی.

آناسی ایلا کؤپک ده یولو گلیردیرلر.

کؤپک دئدی: قار دنه‌سی مئشه‌یه ساری گئدیب یوبانساق اونو جاناوارلار بودارلایاجاق.

قویونون داها اورگی قالمامیشدی بالاسینی الدن وئرمک فیکری اونو چوخ اوزوردو.

مئشه‌یه یاخینلاشدیلار آناسی باشلادی قار دنه‌سینی اونله‌دی، کؤپک ده هورویوردو بلکه اونون سسینه جاناوارلار قورخسون.

ائله بو حالدا بیر کافتار قار دنه‌سینی آغاجین اویوغوندا گؤروب دئدی: به‌به بو گئجه‌نین شامی تاپیلدی، یازیق قار دنه‌سینی آغلایاراق اناسینی چاغیریب یاردیم ایسته‌ییردی.

کافتار قار دنه‌سینه یاخینلاشیردی بیردن کؤپه‌یین هورومک سسینی ائشیتدی، ایکی کؤنوللو اولموشدو قار دنه‌سینی توتوب آپارسین یوخسا ال قویسون قاچاغا.

آنجاق آج اولدوغونا گؤره اوجور یئمه‌لی قوزودان کئچه بیلمه‌ییردی.

ایکی اددیم قالمیشدی قار دنه‌سینه آغرینی آتیب آپارا کؤپک ایله قویون یئتیشدیلر.

قویون دئدی هوی کافتار منیم بالامدان اوزاق دور یوخسا عؤمرونون سون گونو اولاجاق، کؤپک ایسته‌دی کافتار ایلا بوغوشا قویون یوخ دئدی.

اؤزوم گرک بونلا چیخیشام، قویون ایکی_اوچ آددیم گئری چکیلیب کافتارا ساری قاچیب بیر کله‌سی ایله کافتارین قارنیندان ووردو، کافتار ایکی متیر گؤیه آتیلیب آخ دئدی، یئره دوشجک دالینا باخمادان ال قویدو قاچماغا.

قار دنه‌سی آناسی‌نین رشادتینی گؤروب قاچدی اونون قوجاغینا دئدی آنا منی باغیشلا سنین سؤزونو باخمادیم.

آناسی‌نین گؤز یاشی اخاراق بالاسینی باغرینا باسیب داها مندن اوزاقلاشما بالام دئدی.

قار دنه‌سی آناسینا دئدی:

داها یوخ آنا جان، ایندی بیلدیم مئشه چوخ دهشتلی یئردیر، بیلدیم دوشمانلار هر آن بیزی بودارلاماغی گؤزله‌ییرلر، بیلدیم تکجه ائویمیزین امنیتی وار.

آناسی دئدی:

قوربان اولوم گؤزونه

گؤزونه هم اؤزونه

باخسین گرک اوشاقلار

آنالارین سؤزونه

بئله‌لیک ایله اونلار ائوه قاییدیب اوزون ایل‌لر خوش یاشادیلار.

 

آغاجدان اولماز ماشا

شوشه‌نی چالما داشا

هامینیزی ساغ قالین

یئتیشدی ناغیل باشا

 

یازار:علی زنگانلی(وولکان)

یازار:علی زنگانلی(وولکان)

 

 

اگر این مطلب را مفید ارزیابی کردید لطفاً به اشتراک بگذارید :